Featured Media Centre News Womens Cricket

දඹුලු ක්‍රීඩිකාවෝ සුපිරි පළාත් කිරුළ දිනති

දක්ෂතා සහිත කාන්තා ක්‍රීඩිකාවන් සොයා ගැනීමේ ප්‍රධාන අරමුණ ඇතිව ශ්‍රී ලංකා ක්‍රිකට් ආයතනය විසින් සංවිධානය කරන ලද අන්තර් පළාත් කාන්තා විස්සයි-20 ක්‍රිකට් තරගාවලියේ 2019 වසරේ ශූරතාව දිනා ගැනීමට චමරි අතපත්තුගේ නායකත්වයෙන් යුතු දඹුල්ල පළාත් කණ්ඩායම අද (28 දා) සමත්විය. 

කොළඹ එස්. එස්. සී. පිටියේ පැවැති අදාළ අවසන් මහ තරගයේදී ප්‍රතිවාදී කොළඹ පළාත් කණ්ඩායමට එරෙහිව කඩුලු 7ක පහසු ජයක් වාර්තා කළ දඹුල්ල පළාත් පිල ශූරතා කුසලාන සමඟ මුදලින් රුපියල් ලක්ෂ 2 ක ජය මල්ලලකටද හිමිකම් කීවේය. අනූශූරතාවයට පත් කොළඹ පළාත් පිලට මුදලින් රුපියල් ලක්ෂයක මුදලක් හිමිවිය.

කාසියේ වාසිය දිනා ගත් කොළඹ කණ්ඩායම ප්‍රථමයෙන් පන්දුවට පහර දීමට තීරණය කළ නමුත් පන්දුවාර 18.4 කදී සියලු දෙනා දැවී රැස් කරගැනීමට හැකි වූයේ ලකුණු 98 ක් පමණි. පිළිතුරු ඉනිම සඳහා පිටියට පිවිසි දඹුලු කණ්ඩායම එම ඉලක්කය පසුකර ගියේ තවත් පන්දු 22 ක් සහ කඩුලු 7 ක්ම ලකුණු පුවරුවේ ඉතිරි තබමිනි. 

දඹුල්ල කණ්ඩායමේ ජයග්‍රහණය වෙනුවෙන් තුන් ඉරියව්වෙන්ම දක්ෂතා දැක්වූ ක්‍රීඩිකාව බවට පත්වූ ශෂිකලා සිරිවර්ධන පන්දු 41 කට මුහුණ දෙමින් හතරේ පහර 7 ක් සහ හයේ පහර 2 ක් සමගින් ලකුණු 56 ක් ලබා සුවිශේෂී ජයග්‍රහණය සනාථ වන තෙක්ම සිය කඩුල්ල ආරක්ෂා කරගත්තාය.

ලකුණු 14 කට කඩුලු 2 ක් දැවී ගොස් තිබියදී පිටියට පැමිණි දකුණත් පිතිකාරිණිය කොළඹ කණ්ඩායමේ පන්දු යවන්නියන්ට කිසිම අවස්ථාවක් ලබා නොදෙමින් පන්දුවට පහර දීම දිනයේ කැපී පෙනෙනම දක්ෂාතාව ලෙසින් සටහන් විය. පන්දුවට පහර දීමට අමතරව පන්දු යැවීමෙන්ද කැපී පෙනුණු ජ්‍යෙෂ්ඨ ක්‍රීඩිකා ශෂිකලා ලකුණු 21 කට කඩුලු 2 ක් ද දවා ගැනීමට සමත්වූවාය. 

එහිදී හංසිමා කරුණාරත්න සමඟ එක්වූ ශෂිකලා දෙවැනි කඩුල්ල වෙනුවෙන් ලකුණු 70 ක සම්බන්ධතාවයක් එක් කරන ලද්දේ පන්දු 61 ක් පමණක් වැය කරමිනි. එම සම්බන්ධතාවය වෙනුවෙන් හංසිමා ලකුණු 21 කින් දායකත්වය දක්වද්දී ශෂිකලා ලකුණු 47 කින් දායකත්වය දැක්වූවාය.

සත්කාරක කොළඹ පිල අඩු ලකුණු සංඛ්‍යාවකට සීමා කිරීමේදී සුගන්ධිකා කුමාරි ලකුණු 13 කට කඩුලු 3 ක් බිඳ දමද්දී හංසිමා කරුණාරත්න සහ ශෂිකලා සිරිවර්ධන කඩුලු 2 බැගින් දවා දැවී ගිය කඩුලු 10 න් කඩුලු 7 ක්ම බෙදා ගත්හ. ආරම්භයේ සිටම කොළඹ ඉනිම පාලනයකට නතු කරගනිමින් පන්දු යැවූ දඹුලු පන්දු යවන්නියෝ පළමු කඩුලු 4 ම ලකුණු 28 ක් ඇතුළතදී දවා ගනිමින් කොළඹ පිල දැඩි පීඩනයක් ඇද දැමීමට සමත්වූහ.

කෙසේ වෙතත් පිටියට එක්වූ ඕෂධී රණසිංහ විසින් පන්දු 21 කදී දියත් කරන ලද ලකුණු 23 ක ඉනිම හේතුවෙන් එම අසීරුතාවයෙන් ගොඩ ඒමට කොළඹ කණ්ඩායමට හැකිවාය ලැබිණ. නායිකාවකගේ ඉනිමක් ඕෂධී දියත් කරද්දී අමා කාංචනා සහ හෂිනි පෙරේරා පමණක් ලකුණු 19 සහ 13 වශයෙන් ලකුණු 10 සීමාව ඉක්මවා යෑමට සමත්වූ පිතිකාරිණියෝ බවට පත්වූහ. තත්ත්වය එසේ වද්දී සෙසු පිතිකාරිණියන් 8 දෙනාම ලකුණු 10 සීමාවට අඩුවෙන් දැවී යෑම ලකුණු 100 සීමාව හෝ ඉක්මවා යෑමට කොළඹ කණ්ඩායමට හේතු වූ ප්‍රධාන කරුණ බවට පත්විය. 

තරගාවලියේ දක්ෂතම ක්‍රීඩිකාව – හර්ෂිතා මාධවී (නායිකා – මහනුවර කණ්ඩායම) 

තරගාවලියේ දක්ෂතම පන්දු යවන්නිය – ශෂිකලා සිරිවර්ධන (දඹුල්ල කණ්ඩායම)

තරගාවලියේ දක්ෂතම පිතිකාරිණිය – හංසිමා කරුණාරත්න (දඹුල්ල කණ්ඩායම)

අවසන් මහ තරගයේ දක්ෂතම ක්‍රීඩිකාව – ශෂිකලා සිරිවර්ධන (දඹුල්ල කණ්ඩායම)

Related posts

පාකිස්තානයේදී දස්කම් පෑ ක්‍රිකට් විරුවන්ට ක්‍රීඩා අමාත්‍යාංශයෙන් – ක්‍රිකට් ආයතනයෙන් හරසර

Web Admin

සටනකින් තොරවම නිමාවු තරගාවලියක්

Web Admin

බංග්ලාදේශ යොවුන් පිල 2-0 ක් ලෙස තරගාවලියේ ඉදිරියට එති

Web Admin