Featured Media Centre News Schools Cricket Under 19

යොවුන් පිලේ අවිශ්ක තරිඳු ලකුණු 350 ක් ලබා ශ්‍රී ලංකා වාර්තාවක් පිහිටුවයි

By Chamila Karawita

ශ්‍රී ලංකා පාසල් ක්‍රිකට් සංගමයේ මෙහෙයවීමෙන් ක්‍රියාත්මක වයස අවුරුදු 19 න් පහළ පළමු කොටසේ ක්‍රිකට් තරගාවලිය යටතේ ඉනිමක වැඩිම ලකුණු ලබාගත් පිතිකරුවා බවට පත් වෙමින් නව ශ්‍රී ලංකා වාර්තාවක් පිහිටුවීමට ශ්‍රී ලංකා වයස අවුරුදු 19 න් පහළ කණ්ඩායමේ ක්‍රීඩක අවිෂ්ක තරිඳු සමත්විය.

අන්තර් පාසල් පළමු පෙළ ක්‍රිකට් තරගාවලිය යටතේ වත්තල ශාන්ත අන්තෝනි විදුහල් පිල නියෝජනය කරනු ලබන අවිශ්ක කොළඹ ලුම්බිණි විදුහලට එරෙහිව පැවැති තරගයේදී ලකුණු 350 ක් ලබා ගනිමින් එම සුවිශේෂී ශ්‍රී ලංකා වාර්තාවට හිමිකම් කීවේය. පන්දු 285 කට මුහුණ දෙමින් ලබා ගන්නා ලද එම සුවිශේෂ ඉනිම සඳහා අවිෂ්ක හතරේ පහර 56 ක් සහ හයේ පහර 3 ක් එල්ල කර තිබුණි.

අවිෂ්කගේ මෙම දක්ෂතාවය ශ්‍රී ලංකා පාසල් පළමු පෙළ ක්‍රිකට් ඉතිහාසයේ ලකුණු 300 සීමාව ඉක්මවන ලද තෙවැනි අවස්ථාව ලෙසින් සටහන් වුවත් ලකුණු 350 සීමාව ඉක්මවන ලද පළමු අවස්ථාව ලෙසින් සටහන් විය. ශ්‍රී ලංකා වයස අවුරුදු 19 න් පහළ යොවුන් කණ්ඩායමේද සාමාජිකයකු වන අවිශ්ක ක්‍රීඩා කරන ලද මෙම සුවිශේෂී ඉනිමත් සමඟ අවසන් ඉනිම 4 ඇතුළත ලකුණු 673 ක් රැස් කිරීමට සමත්වීම කැපී පෙනෙයි.

අවිශ්කට ප්‍රථම පළමු පෙළ ක්‍රිකට් තරගවලදී ලකුණු 300 සීමාව ඉක්මවා ලූ අනෙක් පිතිකරුවන් යුගලය වන්නේ ජාතික කණ්ඩායමට ක්‍රීඩා කරන ලද දකුණත් පිතිකරු ඉන්දික ද සේරම් සහ පළමු පෙළ තරගාවලිය නියෝජනය කරන ලද ධම්මික වාස් ගුණවර්ධන වේ. මාතර ශාන්ත තෝමස් විදුහල නියෝජනය කරන ලද සේරම් 1993 වසරේදී අම්බලන්ගොඩ දේවානන්ද විදුහලට එරෙහිව ලකුණු 304 ක් ද ධම්මික 1996 වසරේදී මීගමුව මාරිස්ටෙලා විදුහල නියෝජනය කරමින් මීගමුව සාන්ත පීතර විදුහලට එරෙහිව ලකුණු 310 ක් රැස් කර ගැනීමට සමත්ව තිබේ.

දකුණතින් පිත්ත හසුරුවන අවිශ්ක දකුණත් මඳ වේග පන්දු යවන්නකු ලෙසින් කටයුතු කරන අතරම අවශ්‍ය අවස්ථාවන්හිදී කඩුලු රැකීමේ කාර්යයේද නිරත විය හැකි ක්‍රීඩකයෙකි. 2001 වසරේ අප්‍රේල් 26 වැනි දින මෙලොව එළිය දුටු අවිශ්ක මෙම ඉනිමට පෙර ක්‍රීඩා කරන ලද ඉනිම 4 දී, රත්ගම දේවපතිරාජයටඑරෙහිව ලකුණු 181 ක්, කුරුණෑගල මලියදේවයට එරෙහිව ලකුණු 80 ක් සහ මහනුවර සිල්වෙස්තර විදුහලට එරෙහිව නොදැවී ලකුණු 62 ක්ද රැස් කිරීමට සමත්ව තිබේ.

Related posts

කොරෝනා නිසා ක්‍රිකට් නීති වල තාවකාලික වෙනසක්

Web Admin

නැගී එන තුන්කොන් සටනේ ශ්‍රී ලංකාව අවසන් මහ සටනට

admin

ධනංජය සහ ප්‍රදීප්ට විස්සයි-20 තරගාවලිය මඟ හැරෙයි

Chamila Karawita