News Sinhala Column

දිගු ගමනකට මුලපුරන නවෝද් පරණවිතාන

    වත්මන් පාසල් ක්‍රිකට් ක්‍රීඩකයන් අතුරින් ඉක්මණින්ම ජාතික තලයට යා හැකියැයි සැළකෙන විශිෂ්ට ඝණයේ පිතිකරුවකු ලෙසට ශ්‍රී ලංකා 19න් පහළ කණ්ඩායමේ ආරම්භක පිතිකරු, ගාල්ල මහින්ද විදුහලේ නායක 17 හැවිරිදි නවෝද් පරණවිතානව සැලකිය හැකිය.

    දකුණු අප්‍රිකාවේ නොබෝදා පැවැති ලෝක කුසලාන අවුරුදු 19න් පහළ තරගාවලියට පෙර බටහිර ඉන්දීය කොදෙව් දූපත්හි පැවැති ශ්‍රී ලංකා එංගලන්ත සහ කොදෙව් දූපත් අතර 19න් පහළ තුන්කොන් ක්‍රිකට් තරගාවලියේ අවසාන තරග කිහිපයේදී නවෝද් ශතකයක් ඇතුළුව පිතිකරුවකු ලෙස කැපී පෙනෙන දස්කම් දැක්වීමට සමත්වීම නිසා ශ්‍රී ලංකාවට එහි සූරතාව හිමිකරගැනීමට අවස්ථාව උදාවිය.  එපමණක් නොව අනතුරුව පැවැති ලෝක කුසලාන තරගාවලියේදී දකුණු අප්‍රිකාවට එරෙහිව පැවැති පුහුණු තරගයේද ඇතුළුව තවත් තරග කීපයේදීත් ආරම්භක පිතිකරු ලෙස මොහු විශේෂ දක්ෂතා දැක්වීය.

    නවෝද් පරණවිතාන පාසල් ක්‍රිකට් ක්‍රීඩකයෙකු ලෙසද වාර්තා රැසකට හිමිකම් කියයි. එහි ප්‍රධානම වාර්තාවක් වන්නේ පාසල් ක්‍රිකට් ක්‍රීඩකයෙකු ලෙස දෙදින තරගයකදී ලකුණු 409ක් ලබමින් ඉනිමක වැඩිම ලකුණු ලැබූ පාසල් ක්‍රීඩකයා බවට පත්වීමය. මීට සති  කිහිපයකට පෙර ගාල්ල මහින්ද විද්‍යාලයීය ක්‍රීඩාංගණයේ පැවැති මහින්ද – අම්බලන්ගොඩ ධර්මාශෝක තරගයේදී නවෝද් ලකුණු 409ක් ලබාගත්තේ පන්දු 327කට මුහුණ දෙමිණි.  හතරේ පහර 39ක් සහ හයේ පහර 19ක් සහිතව රැස් කරන ලද එම ඉනිම තවත් කළකට පාසල් ක්‍රිකට් ක්‍රීඩකයෙකුට බිදිය හැකි යැයි සිතීම අසීරුය.

    17 හැවිරිදි නවෝද් පරණවිතානට තවත් වසර දෙකක් (2021) යන තුරු ශ්‍රී ලංකා 19න් පහළ ජාතික කණ්ඩායම නියෝජනය කිරීමට අවස්ථාව ඇත. දැනට උසස්පෙළ කාලා විෂයයන් හදාරන මොහු උසස් පෙළ විභාගයට පෙනී සිටිනුයේ ලබන වසරේ අවසාන භාගයේය. දැනට මොහු ශ්‍රී ලංකා 19න් පහළ කණ්ඩායමේ ජ්‍යෙෂ්ටම ක්‍රීඩකයෙකි.

    2002 මැයි 16 වැනිදා ගාල්ලේදී උපත ලද නවෝද් පරණවිතාන ගාල්ල කරාපිටියේ පදිංචිකරුවෙකි. නවෝද්ගේ පියා කැලුම් පරණවිතාන යුද හමුදාවේ මිලිටරි පොලීසියේ සේවය කොට විශ්‍රාමගෙන සිටී. මව දීප්ති දහනායක ගෘහණියකි.

“මට වැඩිමහල් සහ බාල සොහොයුරෙකු සිටිනවා. අයියා ක්‍රිකට් ක්‍රීඩා කළත් දිගටම කරගෙන ගියේ නෑ. මල්ලී වැඩිය කැමති පාපන්දු ක්‍රීඩාවටයි. ධනුෂ්ක දෙනගම මා කුඩා කාලයේත් යොමාල් සංජීව ඉන්පසුවත් මගේ පුහුණුකරුවන් ලෙස කටයුතු කළා. තාත්තාගේත් පුහුණුකරුවන්ගේත් ලැබුණු සහය මගේ ක්‍රිකට් ඉදිරි ගමනට විශාල රුකුලක් වූවා. හලාවත මේරියන්ස් කණ්ඩායමට ක්‍රීඩා කරන්න යැයි ඔවුන් මට ආරාධනා කළා. ඉදිරියේදී එම කණ්ඩායම නියෝජනය කිරීමට බලාපොරොත්තු වනවා” යැයි බවද නවෝද් පරණවිතාන ශ්‍රී ලංකා ක්‍රිකට් ආයතනයේ වෙබ් අඩවිය සමග පැවැති සාකච්ඡාවකදී ප්‍රකාශ කළේය.

    වමතින් පිත්ත හසුරුවන නවෝද් වමතින් මද වේග පන්දු යැවීමටද සමතෙකි. ඔහු කඩුලු රකින්නකු ලෙස ද දක්ෂතා දක්වයි. 19න් පහළ එක්දින තරග 36කදී ලකුණු 979ක් (ඉනිමක සාමාන්‍ය 27යි) කඩුලු 22ක්ද ලබා ඇත. 19න් පහළ සිව්දින ටෙස්ට් තරග දෙකකදී (ඉනිම 4යි) ලකුණු 171ක් රැස්කර ඇත්තේ ඉනිමක ලකුණු 42ක සාමාන්‍යයකිනි. එහි ඉනිමක වැඩිම සංඛ්‍යාව 79කි.

බන්දුල මොල්ලිගොඩ

Related posts

ශ්‍රී ලංකා 19න් පහළ පිල දෙවැනි ජයග්‍රහණයත් ලබාගනී

Web Admin

4 ඉලක්කම අකිලට ගෙනා වාසනාව

Web Admin

Injury Update: Mendis and Jayasuriya unlikely to feature in 3rd T20I

Web Admin